INNOM: Bustadplan og tilflytting i Stryn
Fredag 30. august samla Mogleg igjen næringsliv, kommune og samfunnsaktørar til INNOM – frukostmøtet med substans. Denne gongen stod bustadpolitikk og tilflytting i fokus, med innlegg frå Stryn kommune og Nordfjordkompaniet.
Ein bustadpolitisk plan for framtida
Kommunalsjef for samfunnsutvikling i Stryn, Steinar Nesdal, presenterte kommunen sin komande bustadpolitiske handlingsplan – eit arbeid som vil få stor betydning for rekruttering, bulyst og framtidige behov i heile kommunen.
– Dette er ein spennande plan, og ikkje så tørr som den høyrest ut til, sa Nesdal.
Planen peikar særleg på tre viktige utfordringar:
Airbnb og korttidsutleige: Mange bueiningar blir leigd ut på korttidsbasis, noko som gjer det vanskeleg for fastbuande og nye tilsette å finne bustad. Nokre verksemder har allereie mista søkarar og tilsette på grunn av dette. Kommunen vurderer difor reglar for å sikre fleire heilårsbustadar.
Aldrande befolkning: Talet på innbyggarar over 80 år vil truleg doblast innan 2050. Det gir nye krav til bustadar som er tilrettelagde for eldre, til sentrumsnære bufellesskap og til omsorgsbustadar i nærleiken av omsorgssentera.
Variert bustadmarknad: Stryn har få brukte og nye bustadar til sals samanlikna med nabokommunar. Planen legg difor opp til eit større mangfald av bustadar – frå sosiale bustadar til bustadar som passar ulike livsfasar – for å sikre både rekruttering og livskvalitet.
Steinar Nesdal, Kommunalsjef for samfunnsutvikling i Stryn
– Stryn skal vere ein god stad å bu heile livet, oppsummerte Nesdal.
Tilflytting krev bustadar
I andre del av møtet delte Anders Lødemel frå Nordfjordkompaniet sine erfaringar med rekruttering og bulyst.
– Mange vil til Stryn, men vi opplever at det skal relativt lite til for at folk ikkje kjem hit likevel, sa Lødemel.
Nordfjordkompaniet har hjelpt over 100 personar inn i jobb i Nordfjord – 25 hittil i år – men ser at bustadtilbodet ofte blir ei flaskehals. I sine innspel til kommunen peikar dei særleg på behovet for:
Utleigebustadar for unge arbeidstakarar, lærlingar og studentar
Rimelege førstegongsbustadar
Moglegheita til å «prøvebu» i Stryn
Sentrumsnære bustadar for unge og familiar
Lødemel viste også til Bremanger kommune, som har tatt i bruk bustadtilskot, gratis barnehage og nedskriving av studielån som aktive verkemiddel for å tiltrekke seg nye innbyggarar.
Anders Lødemel, Nordfjordkomapniet
Samarbeid for bulyst
Både Stryn kommune og Nordfjordkompaniet er tydelege på at bustadpolitikk heng tett saman med tilflytting, arbeidsplassar og samfunnsutvikling. For å lykkast må ein tenke heilskapleg – og legge til rette for at Stryn skal vere ein god stad å bu, heile livet.
_________________________________________________________________________
INNOM samlar næringsliv, det offentlege og engasjerte aktørar rundt same bord – og gir rom for nye perspektiv og konkrete innspel til vidare utvikling.
💡 Det er nettopp dette INNOM handlar om: korte, kraftfulle møtepunkt der vi deler kunnskap, bygger relasjonar og finn inspirasjon til handling.
Følg med – neste INNOM er rett rundt hjørnet. Kanskje er det nettopp der du får idéen eller kontakten som gir deg fart vidare?